Эміграваўшы ў Германію, беларускі прадпрымальнік Зміцер Завадскі сутыкнуўся з праблемай — знайсці ў крамах беларускія кнігі і рэчы было складана. Тады ў яго з’явілася ідэя — стварыць вялікую кніжную анлайн-краму. За месяц канцэпцыя трансфармавалася — і ў выніку атрымаўся міжнародны маркетплэйс Kamaroŭka, які аб’яднаў беларускіх прадаўцоў з розных краін Еўропы. MOST даведаўся ў Змітра, хто, што і навошта там набывае.
«Хацелі зрабіць сапраўдны беларускі рынак»
Да эміграцыі Зміцер больш за 10 гадоў займаўся прадпрымальніцтвам — развіваўся ў сферы будаўнічых паслуг.
— Мы ўсе сацсеткі і камунікацыю вялі па-беларуску, выкарыстоўвалі нацыянальную сімволіку, адзначалі зніжкамі Дзень Волі і іншыя значныя падзеі, — згадвае той перыяд Зміцер.
Яшчэ з 2000-х беларус паралельна займаўся грамадскай дзейнасцю — удзельнічаў у палітычных кампаніях і акцыях. Кажа, думаў, як можна «пашырыць межы беларушчыны».
У Германію беларус прыехаў напрыканцы 2021 года. Менавіта там ён распрацаваў ідэю «сапраўднага беларускага рынку» — і назву праект атрымаў адпаведную — Kamaroŭka.
— Гэта культурны сімвал — гандлёвы раён, вядомы нават тым, хто ніколі не быў у Мінску. Мы свядома абралі цёплую, «сваю» назву, якая лёгка счытваецца ў дыяспары, — тлумачыць Зміцер.
«Даводзілася прадаваць рэчы, каб аплаціць працу»
Да беларуса далучыліся валанцёры, якія дапамагалі ў распрацоўцы сайта, — у пікавы момант працавала каля 30 спецыялістаў. Самым складаным аказалася перакласці асноўную версію платформы на беларускую мову — гэта заняло больш за ўсё часу. Усяго на запуск спатрэбілася тры гады.
— Часам даводзілася прадаваць рэчы, каб падтрымліваць развіццё праекта і аплачваць працу спецыялістаў. Цяпер мы працуем учатырох без заробку, — кажа Зміцер. І дадае, што грошы ад продажу дома ў Беларусі таксама пайшлі на праект.
Пакуль маркетплэйс працуе ў мінус: штомесячныя выдаткі значна перавышаюць тое, што атрымліваецца зарабіць.
— З той тэндэнцыяй, якую маем зараз, верагодна, толькі праз год мы зможам выйсці ў нуль. Але асноўная матывацыя тут не камерцыйная: хачу рабіць карыснае для Беларусі, — кажа Зміцер.
18 з 22 прадаўцоў знаходзяцца ў Польшчы
Kamaroŭka працуе ўжо паўгода. На маркетплэйсе рэгіструюцца беларускія прадаўцы з розных краін Еўропы. З-за санкцый падключыць прадаўцоў з Беларусі пакуль немагчыма — платформа не дазволіць праводзіць транзакцыі. Пры тым даслаць тавар заказчыку ў Беларусь усё яшчэ можна.
— Тавары лятаюць па ўсім свеце. Таму магу сказаць, што мы сапраўды міжнародная платформа.
18 з 22 прадаўцоў, што гандлююць на Kamaroŭka, знаходзяцца ў Польшчы. У гэтай жа краіне жыве большасць пакупнікоў. Таму для многіх удзельнікаў дастаўка часта атрымліваецца хуткая і недарагая.
«Пагоня» і хатні зефір
Цяпер асартымент маркетплэйса складаецца з тавараў розных катэгорый. Прадаюць адзенне, рамесныя вырабы, кнігі. Але, па назіраннях Змітра, прапановы ніжэйшыя за запыт. Беларусы гатовы набываць рэчы, але часам ім не хапае варыянтаў. Таму асартымент плануюць пашыраць.
— Мы як Amazon — пачалі з кніг. Гэтая катэгорыя расце найхутчэй. Нядаўна з’явіліся і першыя харчовыя тавары — хатні зефір ад беларускіх вытворцаў у Польшчы.
А самым папулярным таварам на маркетплэйсе аказаўся герб «Пагоня» ручной працы.
Украінцы цікавяцца беларускай касметыкай, немцы — дарагім хэнд-мэйдам
Прадпрымальнік прызнае, што ў эміграцыі беларусы паступова інтэгруюцца ў новае грамадства. Таму з цягам часу попыт на выключна беларускія тавары можа знізіцца. Але вялікай праблемы ў гэтым суразмоўца не бачыць.
— Беларусы ўсё адно не губляюць сваю ідэнтычнасць, — лічыць стваральнік.
У будучыні Зміцер хацеў бы, каб Kamaroŭka выходзіла за межы беларускага кам’юніці.
— Магчыма, пэўныя тавары будуць цікавыя не толькі беларусам. Напрыклад, ад украінцаў увесь час чую: «Ці ёсць на маркетплэйсе беларуская касметыка»? Немцам, мяркую, былі б цікавыя іншыя рэчы, якасны хэнд-мэйд напрыклад. Але пакуль мы скіраваныя на нашу аўдыторыю. Я веру ў Беларусь і беларусаў — і мая вера не вагаецца ўсё жыццё, — кажа прадпрымальнік.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
