Уначы на 21 снежня раптоўна памёр Мікіта Мелказёраў, вядучы ютуб-канала «Жыццё-маліна» і праекта «Загляне сонца». Яму было 37 гадоў.
Мікіта Мелказёраў нарадзіўся ў Хабараўску, адкуль быў бацька, але ў пяцігадовым узросце маці перавезла яго на сваю радзіму, у Беларусь. Ужо ў сталым узросце Мікіта зрабіў выбар на карысць беларускай мовы.
Сярод яго герояў былі беларускія дэмакратычныя лідары, дзеячы культуры і спорту з актыўнай грамадзянскай пазіцыяй, а таксама расійскія дзеячы, як гісторык Тамара Эйдэльман ці палітык і блогер Максім Кац. Для шэрагу беларускіх палітыкаў у вымушанай эміграцыі Мікіта быў адной з магчымасцей дацягнуцца да шырокай аўдыторыі ўнутры Беларусі.
Спачуванні родным і блізкім Мікіты выказала Святлана Ціханоўская. «Немагчыма паверыць. Здаецца, быццам такога проста не магло здарыцца. На жаль, у ноч на 21 снежня памёр журналіст і вядоўца «Жыццё-маліна» Мікіта Мелказёраў. Мікіта ўмеў рабіць рэдкую рэч — даваць чалавеку прастору быць сабой. Яго праца зрабілася важнай часткай беларускай медыйнай прасторы. І заўсёды ёй застанецца. Выказваю шчырыя спачуванні родным і блізкім Мікіты, сябрам, калегам і ўсім, хто любіў яго. Гэта вялікая страта для беларусаў», — напісала яна.
«Мікіта быў выбітным, таленавітым журналістам і па-сапраўднаму светлай асобай. Ён быў чалавекам вялікай душы і шчырым патрыётам Беларусі. Нам будзе вельмі не хапаць ягонага голасу, святла і нязломнай веры ў лепшую будучыню нашай краіны. Светлая памяць і вечны спакой», — напісаў, выказваючы спачуванні, Павел Латушка.
Паэт Уладзімір Някляеў развітаўся з Мікітам вершам:
«Жыццё маліна, ці палын?» –
Спытаў аднойчы бацьку сын.
І той сказаў, абняўшы сына:
«Каму – палын, каму – маліна».
Бывай, Мікіта!»
У апошнія дні Мікіта працягваў працаваць. Незадоўга да смерці на яго канале «Жыццё-маліна» выйшла інтэрв’ю з Аляксандрам Кныровічам, прысвечанае вызваленню 123 беларускіх палітвязняў.
У апошні дзень жыцця ён запісваў размову з былым дырэктарам «Радыё Свабода» Аляксандрам Лукашуком. «Чатыры нялёгкія гадзіны запісу ён адпрацаваў на адным дыханні. Дакладней, на двух — мы ўсё ж зрабілі перапынак на каву пасля першых дзвюх гадзінаў. Мікіта тэлефанаваў дадому — там была нейкая праблема, ён пераймаўся, казаў што ратуе свайго сабаку, перапытваў як што. Мікіта выглядаў як звычайна на экране — прыгожы, моцны малады чалавек, упэўнены, добра падрыхтаваны. Можа, твар быў бледны, вочы трохі праваліліся, але я не ведаў, ці гэта ад самаадчування, ці ад лёгкага макіяжу. Ды і гутарка была няпростая», — расказаў пазней Лукашук «Радыё Свабода».
У студзені Мікіта ажаніўся з мадэллю Лінай Цапавай.
Дапамагчы сям’і можна па спасылцы.
