Беларускі мужчынскі гурт «Касары» выйшаў у фінал фестывалю фальклорнай музыкі Nowa Tradycja ў Варшаве. Калектыў адзначылі спецыяльным прызам ад Польскага радыё Jedynka.
Гурт «Касары» быў створаны ў 2023 годзе ў Варшаве па ініцыятыве беларускага музыкі і даследчыка традыцыйнай культуры Сяржука Доўгушава. Калектыў займаецца адраджэннем традыцый беларускіх мужчынскіх спеваў. Рэпертуар гурта складзены з касарскіх, жаўнерскіх, рэкруцкіх і лірычных песень беларускай народнай музычнай спадчыны.
Спецыяльна для выступу на фестывалі калектыў разнастаіў аранжыроўкі рэкруцкіх і бяседных песень электронным складнікам, дзякуючы чаму яны загучалі яшчэ больш атмасферна. Варшаўская публіка вельмі цёпла сустрэла беларускіх музыкаў.
— Я ішоў песімістычна, таму што мы не паспелі зрабіць польскую песню, — прызнаецца ў каментары MOST Сяржук Доўгушаў. — Выходзілі толькі з беларускімі песнямі. Але мы запрасілі такога класнага электроншчыка Стаса Чахоўскага. І ў выніку мы пачулі [ад публікі] вельмі шмат цёплых слоў.
Паводле вынікаў конкурсу гурт «Касары» сталі лаўрэатамі конкурсу, атрымалі дыплом і былі адзначаны спецыяльным прызам Jedynka. Гэта дае калектыву магчымасць выступіць з сольным канцэртам у вялікай залі Польскага радыё. Арганізацыя і прамоцыя канцэрта з’яўляюцца часткай прэміі. Сяржук лічыць такі прыз лепшым за грашовы і куды больш каштоўным.
Разам з беларусамі ў фінальны дзень конкурсу, 22 мая, на сцэне фестывалю выступілі гурт Piąty Żywioł, які працуе на стыку фолку і джазу, мінімалістычна-авангардны дуэт Braty, калектыў Etersoul з імправізацыйным этна-джазавым спалучэннем кларнета і электрагітары, а таксама Павел Плоскань, у руках якога колавая ліра набыла ўзнёслае прагрэсіўна-псіхадэлічнае гучанне.
Гран-пры фестывалю атрымала польская мультыінструменталістка Караліна Матушкевіч.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
