Замежнікі, якія нелегальна перасякаюць беларуска-польскую мяжу ў асноўным прыязджаюць у Беларусь з Расіі. Пра гэта распавядае Польскае радыё са спасылкай на прэс-сакратарку памежнай службы Польшчы Ганну Міхальску. Яна звярнула ўвагу на змяненні лагістыкі гібрыднай аперацыі Пуціна і Лукашэнкі, накіраванай супраць Польшчы.
Нягледзячы на збудаванне па ініцыятыве польскага ўрада загароды на мяжы з Беларуссю, нелегальныя мігранты працягваюць спробы патрапіць у Польшчу.
— Расія зʼяўляецца асноўным транзітным каналам пранікнення мігрантаў у Беларусь. Яны прылятаюць у Маскву і Санкт-Пецярбург і адтуль дабіраюцца да Мінска. Нечага падобнага мы не назіралі летась. У мінулым годзе мы сутыкаліся з асобамі, якія прыбывалі ў Беларусь наўпрост са сваіх краін паходжання.
Сёлета рэжым Лукашэнкі пры падтрымцы Расіі значна пашырыў кола краін, з якіх прыцягваюцца замежнікі. Цягам аднаго месяца палякі затрымалі грамадзян 40 розных дзяржаў, у асноўным Афрыкі: Джыбуці, Бенін, Габон, Новая Гвінея, але таксама Кітай, Гаіці ды Маўрыкій. Летась мігранты прыбылі ў асноўным з Ірака, Афганістана, Сірыі і Ірана.
Сцяна — не перашкода
Беларускія памежнікі даюць магчымасць мігрантам рабіць падкопы на беларуска-польскай мяжы. Дзякуючы падкопам замежнікі пераадольваюць пяціметровы плот, усталяваны Польшчай на мяжы з Беларуссю.
10 жніўня на тэрыторыю Польшчы спрабавалі нелегальна трапіць 36 чалавек. Гэта былі грамадзяне Кубы і Егіпта. Яшчэ 13 іншаземцаў падышлі пад мяжу ў раёне Крынак, але, убачыўшы польскія патрулі, адышлі.
