15 жніўня 2022 года пачынаецца суд над журналістам Дзянісам Івашыным. Івашына абвінавачваюць ва ўмяшанні ў дзейнасць супрацоўніка органаў унутраных спраў і здрадзе дзяржаве. Агулам журналісту пагражае сур’ёзны тэрмін — да 15 гадоў зняволення.
Суд распачнецца 15 жніўня ў Гродзенскім абласным судзе. Суддзёй будзе Валер Раманоўскі. Раманоўскі ўдзельнічаў у палітычных рэпрэсіях: неаднаразова даваў суткі пратэстоўцам, разглядаў крымінальныя справы.
Дзяніса Івашына затрымалі 12 сакавіка 2021 года супрацоўнікі КГБ. Сілавікі праводзілі ператрус у яго і ў доме яго маці, а пазней прыйшлі з ператрусам да 95-гадовай бабулі. Ужо паўтара года журналіст знаходзіцца за кратамі ў гродзенскай турме.
Спачатку Дзянісу Івашыну выставілі абвінавачванні па артыкуле 365 Крымінальнага кодэкса «Умяшанне ў дзейнасць супрацоўніка ўнутраных спраў». У кастрычніку 2021 года прад’явілі новае абвінавачванне — артыкул 356 Крымінальнага кодэкса, па якім Дзяніса абвінавачваюць у супрацоўніцтве з украінскай разведкай.
