2 лютага стала вядома, што падчас рэферэндуму ў Беларусі ўчасткаў для галасавання за мяжой не будзе. Прадстаўнікі беларускай дыяспары Беластока пачалі збіраць подпісы для адкрыцця ўчастка ў консульстве, а таксама распавялі MOST, што думаюць на конт ініцыятывы беларускага выбаркама.
Прычын адсутнасці участкаў для галасавання, па словах прэс-сакратара беларускага МЗС Анатоля Глаза, некалькі: эпідэмія каронавіруса, не хапае супрацоўнікаў, ахова, а таксама ў некаторых пасольствах на ўліку занадта мала людзей. Беларусы, якія пражываюць за мяжой, змогуць узяць удзел у рэферэндуме, толькі вярнуўшыся ў Беларусь.
Пасля інфармацыі пра адмену ўчасткаў, беларусы Беластока пачалі збіраць подпісы з патрабаваннем ў консульства Беларусі, каб адкрылі ўчастак. Патрэбна 20 подпісаў беларусаў, якія знаходзяцца на консульскім уліку.
Штокажуць беларусы ў Беластоку?
Аляксандра (пенсіянерка)
— Я катэгарычна супраць рэферэндуму, а ўжо калі яго вырашылі праводзіць, дык чалавек павінен аддаць свой голас там, дзе ён жыве, як было раней. Я магу і ў Варшаву даехаць, калі гэта трэба будзе, але не ў Беларусь. Я не жадаю, каб мяне прыніжалі бандыты, якія захапілі ўладу. У добрага чалавека не могуць быць навокал дрэнныя суседзі. Мае бацькі не для таго змагаліся з фашызмам, каб іх адзіная дачка 76 гадоў пасля Перамогі, ва ўзросце амаль 70 гадоў, вымушана пакінуць Беларусь. На каленях я магу стаяць перад народам Польшчы, Літвы і іх урадаў, у знак падзякі, што я жыву ў свабоднай краіне, але не дома.
Падчас рэферэндуму ў Беларусі ўчасткаў для галасавання за мяжой не будзе
Сяржук (ахоўнік)
— Усё пасьлядоўна, згодна лёгікі акупацыйных уладаў у Беларусі: там, дзе немагчымы абсалютны кантроль за працэсам фальсіфікацыі, трэба дзейнічаць па прастой фармулёўцы – не дапаможа адсутнасьць фіранак на кабінках, то ўвогуле не рабіць участкі. Лукашэнкаўскія ўлады чарговы раз дзейнічаюць па прынцыпе “не да законаў”. Просты адказ прыхільнікам “крыжыкаў”. І не толькі ім. Дык гэта тэрарыстычная хунта, ці законная ўлада? Калі першае, то навошта ўдзельнічаць у іх “схадняках”? Давайце ўрэшце вызначацца. Той, у каго “адціснулі” права на яго голас, ніколі не вярне яго дэмакратычным шляхам. Але можа паспрыяць, каб міжнародныя інстытуцыі прызналі лукашэнкаўскую ўладу ў Беларусі – “дзеючай па факце”.
Кацярына (хатняя гаспадыня):
— Я думаю, што не адкрыццё ўчасткаў для галасавання за мяжой сведчыць пра страх рэжыму перад праявамі салідарнасці беларусаў. Моцна мяне гэта не засмуціла. Таму што гэты “рэферэндум” – нікому не патрэбная пустышка. Думаю, у гэты дзень мы правядзем акцыю каля консульства, можа быць, свой рэферэндум з пытаннем значна больш актуальным, чым выбар паміж Лукашэнкам і Лукашэнкам.
Ян (прадпрымальнік)
— Рэжым баіцца, што людзі масава прыйдуць за мяжой на выбарчыя участкі і перакрэсляць бюлетэнь. Таму робяць усё каб не паўтарыўся масавы выхад людзей за мяжой ў дзень галасавання. Можна паглядзець па фотаздымках як ў Беластоку масава беларусы выйшлі прагаласаваць супраць Лукашэнкі ў жніўні 2020 года.
27 лютага ў Беларусі адбудзецца ініцыяваны ўладамі краіны рэферэндум па змене Канстытуцыі. Галасаванне будзе праходзіць ва ўмовах бесперапыннага палітычнага крызісу, апазіцыя прадставіла сваю стратэгію — беларусаў заклікаюць прыходзіць на ўчасткі і рабіць бюлетэнь несапраўдным, закрэсліваючы абодва варыянты волевыяўлення.
