Гродзенскі абласны суд разглядае справу шматдзетнай маці і актывісткі з Пружанаў Юліі Лаптановіч. Жанчыне пагражае да пяці гадоў пазбаўлення волі — такі тэрмін запрасіў дзяржаўны абвінаваўца. Аб гэтым паведамляе праваабарончы цэнтр «Вясна».
Ад 4 ліпеня ў Гродзенскім абласным судзе разглядаецца справа Юліі Лаптыновіч. Судовы працэс вядзе суддзя Віктар Сянько.
Юлія Лаптановіч разам з мужам Ігарам была раней асуджаная па «карагоднай справе». Ігара Лаптановіча накіравалі адбываць тэрмін у калонію на два з паловай гады, а Юліі прысудзілі «дамашнюю» хімію на тры гады. Пасля першага прысуду жанчыну затрымалі зноў: яе абвінавацілі па шасці крымінальных артыкулах. Яна знаходзілася за кратамі дзевяць месяцаў.
На волі бацькоў чакаюць трое дзяцей.
У чым вінавацяць Юлію Лаптановіч
Юлію Лаптановіч абвінавачваюць па шасці артыкулах Крымінальнага кодэкса Беларусі:
- артыкул 188 (Паклёп);
- частка 1 артыкула 13 артыкула 369 (Стварэнне ўмоў для здзяйснення абразы прадстаўніка ўлады);
- частка 1 артыкула 13 артыкула 389 (Стварэнне ўмоў для здзяйснення пагрозы ў дачыненні да суддзі);
- частка 6 артыкула 16 і ч. 1 артыкула 366 (Садзейнічанне да пагрозы гвалтам у дачыненні да службовай асобы);
- частка 3 артыкула 203-1 (Незаконныя дзеянні ў дачыненні да персанальнай інфармацыі);
- частка 1 артыкула 361-4 (Садзейнічанне экстрэмісцкай дзейнасці).
Дзяржаўны абвінаваўца сцвярджае, што Юлія Лаптановіч перадала звесткі аб асобах, якія ажыццяўлялі крымінальны пераслед у дачыненні да яе сям’і. За гэта Лаптановіч атрымала 500 еўра, а затым перадавала грошы пацярпелым ад сілавікоў у Беларусі. Грошы жанчына атрымлівала і за інфармацыю пра іншых сілавікоў. Яны кажуць, што пацярпелі ад таго, што іх дадзеныя былі апублікаваныя ў сацыяльных сетках.
