Два месяцы ў тэлеграме працуе бот BelPolska, які дапамагае прыезджым беларусам у Польшчы. За гэты перыяд паслугамі сэрвісу скарысталіся 2746 чалавек. Самыя запатрабаваныя раздзелы — пра легалізацыю ў Польшчы, медыцыну і жытло. 4 жніўня стваральнік бота Дзмітрый Ягораў апублікаваў адзін з самых карысных раздзелаў, які тычыцца сацыяльных выплат на дзяцей.
4 жніўня Ягораў дадаў абнаўленне ў бота, якое тычыцца сацыяльных выплат на дзяцей.
— Я апублікаваў хіба адзін самых карысных раздзелаў — як і якія дапамогі на дзяцей можа атрымаць беларуская сям’я ў Польшчы, у тым ліку тыя, хто не мае карты побыту. Па-мойму важна, што гэта не проста рэрайт і пераклад інфы з афіцыйных сайтаў — я дазвоньваўся ў ZUS, каб атрымаць актуальную інфармацыю, знаходзіў беларусаў, якія прайшлі гэтыя сцежкі, і ўдакладняў пра розныя акалічнасці і падводныя камяні. Бот існуе ўсяго толькі няпоўныя два месяцы, але ўсё больш нагадвае паўнавартасны гайд па фармальнасцях і працэдурах. Праект некамерцыйны, але будзе існаваць роўна столькі, колькі часу будзе запатрабаваны ў нашай супольнасці, — распавёў МOST Зміцер Ягораў.
Як працуе бот?
Калі запусціць бот, ён адразу прапаноўвае выбраць з меню тую справу, якую трэба вырашыць. І потым па ланцужку тлумачыць, што і як трэба рабіць. У будучыні, магчыма, можна будзе проста напісаць запыт, і ён па ключавых словах прапануе адказ.
Таксама ў боце можна падтрымаць стваральніка, каб матываваць рабіць прадукт яшчэ больш карысным для беларусаў у Польшчы.
