Напярэдадні чарговай акцыі салідарнасці з пераследаванымі лідарамі польскай меншасці ў Беларусі Анжалікай Борыс і Анджэем Пачобутам гродзенскі журналіст Ян Роман выказаўся пра сітуацыю ў Беларусі з польскасцю і знішчэнне месцаў памяці.
25 ліпеня ў Беластоку ў скверы каля помніка Ежы Папялушку пройдзе чарговая акцыя ў падтрымку рэпрэсаваных у Беларусі палякаў Анджэя Пачобута і Анжалікі Борыс. Лідарка палякаў у Беларусі Анжаліка Борыс і журналіст Анджэй Пачобут былі затрыманыя ў сакавіку 2021 года, ім інкрымінуюць рэабілітацыю нацызму. Ім пагражае ад 5 да 12 гадоў зняволення.
25 сакавіка 2022 года Анжаліцы Борыс змянілі меру ўтрымання на хатні арышт, Анджэй Пачобут тым часам застаецца ў турме ўжо амаль паўтара года.
«16 месяцаў не спыняецца пераслед полськай меншасці»
Каментар гродзенскага журналіста Яна Романа прыводзіць Радыё Рацыя:
— Я знаёмы з Анжалікай Борыс і Анджэем Пачобутам досыць даўно. І тое, што Анджэй зараз знаходзіцца за кратамі, сведчыць пра тое, перадусім, як ставяцца ўлады Беларусі да польскай меншасці і яе лідараў. І пра гэта сведчыць тое, што Анджэй 16 месяцаў знаходзіцца за кратамі, і 16 месяцаў не спыняецца пераслед польскай меншасці ў нашай краіне.
«Памяць — адзінае, на што Лукашэнка не мае ўплыву»
На пытанне журналіста «Рацыі», ці знаёмыя яму месцы пахавання польскіх жаўнераў, якія зараз руйнуюць у Беларусі, Ян Роман адказаў, што ведае іх фактычна ўсе.
— Я ў сілу сваёй дзейнасці больш за дзесяць гадоў з’яўляюся аўтарам праграмы «Над Немнам» — праграмы, якая выходзіць на польскім тэлебачанні і на «Белсаце» і распавядае пра жыццё польскай меншасці на Беларусі. І акурат ва ўсіх гэтых месцах я быў. І што тычыцца апошняга факту руйнавання ў Стрыеўцы: там стаяў вялікі помнік у памяць пра больш як 30 загінулых жаўнераў Арміі Краёвай у 1943 годзе падчас сутычкі з нямецкай жандармерыяй. І гэты помнік стаў чарговай ахвярай рэжыму ў Беларусі. Так атрымліваецца, што Лукашэнка бярэ ў закладнікі не толькі жывых, як Анжаліку і Анджэя, ён бярэ ў закладнікі мёртвых, што аддалі жыццё за незалежнасць краіны. І ён хоча памяць гэтую вынішчыць. Ён спрабуе такім чынам зачысціць прастору ад польскай гісторыі. Але наўрад ці яму гэта ўдасца. Памяць — гэта адзінае, на што Лукашэнка не мае ўплыву. Яна захаваецца незалежна ад таго, хоча ён гэтага ці не.
Акцыя салідарнасці з пераследаванымі лідарамі польскай меншасці ў Беларусі Анжалікай Борыс і Анджэем Пачобутам пройдзе ў Беластоку ў панядзелак, 25 ліпеня, у скверы каля помніка Ежы Папялушку (непадалёк ад палацу Браніцкіх). Пачатак у 19:00.
