Міхаілу Шавельскаму з Гродна быў 21 год. Пасля пратэстаў 2020 года ён выехаў з Беларусі ў Польшчу і паступіў вучыцца ў Хрысціянскую тэалагічную акадэмію ў Варшаве. Хацеў стаць святаром. З пачаткам поўнамаштабнай вайны ва Украіне гродзенец запісаўся добраахвотнікам і паехаў ваяваць супраць расійскіх акупантаў.
Міхаіл загінуў 10 кастрычніка 2022 года.
Міхаіл ваяваў у палку Каліноўскага і выконваў функцыю парамедыка. Ён загінуў падчас выканання баявога задання — поўз дапамагаць параненаму. Хлопца расстралялі з расійскага танка.
Як кажуць у палку, Міхаіл загінуў смерцю героя.
— Ён быў з намі з самага пачатку, прыйшоў з вучэбкі. Вучыўся ўсяму ў нас, стаў медыкам. Падчас задання ён не ўцёк, нягледзячы на шчыльны агонь праціўніка і танкавы расстрэл. Ён сабраўся і высунуўся ў паказаным кірунку. Танк ударыў у некалькіх метрах ад Мішы, так яго і закранула. Ён загінуў гераічна, як мужчына, — распавёў MOST знаёмы Міхаіла.
Міхаіл Шавельскі быў адным з першых беларускіх добраахвотнікаў, хто паехаў абараняць Украіну з пачаткам поўнамаштабнай вайны. Да Польшчы і Украіны хлопец вучыўся ў Гродзенскім універсітэце імя Янкі Купалы. Быў затрыманы за ўдзел у пратэстах, адбываў адміністрацыйны арышт.
Михаіл стаў першым гродзенцам, хто загінуў у 2022 годзе на вайне ва Украіне. На сёння вядома пра 14 загінулых ва Украіне беларускіх добраахвотнікаў.
