Рух беларускай салідарнасці і Кардынацыйная рада прапануюць стварыць умовы, каб беларускую мову ў Польшчы маглі вывучаць не толькі грамадзяне Польшчы, але і ўсе беларускія дзеці, якія легальна жывуць у краіне. Для гэтага пачалі збіраць подпісы.
— Зараз беларускую мову ў польскіх школах могуць вывучаць толькі прадстаўнікі беларускай нацыянальнай меншасці — тыя дзеці, чые бацькі маюць польскае грамадзянства і лічаць сябе беларусамі, — тлумачаць ініцыятары. — Сёння ў Польшчы жыве больш за сто тысяч беларусаў, якія маюць легальны статус. Аднак да атрымання грамадзянства патрэбна яшчэ некалькі гадоў. Усе гэтыя гады іх дзеці пазбаўлены магчымасці вывучаць родную мову, гісторыю і культуру.
Дэмакратычныя сілы хочуць, каб вывучаць беларускую мову маглі беларусы, якія знаходзяцца ў Польшчы ў легальным статусе, у тым ліку на падставе карты часовага і сталага побыту і ў статусе ўцекача.
Аднак для гэтага спатрэбіцца змяніць закон «Пра нацыянальныя і этнічныя меншасці і рэгіянальныя мовы».
— Польскае грамадзянства можна атрымаць толькі праз дзесяць гадоў жыцця на тэрыторыі Польшчы. За гэты час можа адбыцца адкат у беларускай культуры, мове і ідэнтычнасці беларусаў замежжа. Змена ў законе можа паўплываць на тое, каб ужо цяпер беларусы за мяжой захоўвалі свае карані, — абгрунтоўваюць сваю пазіцыю аўтары ініцыятывы.
