Беларус Лукаш Леанюк абвясціў, што яго праект з міні-скульптурамі ў чарговы раз удзельнічае ў гарадскім конкурсе Беластока. Калі ён выйграе, то атрымае фінансаванне з гарадскога бюджэту.
Папулярызацыя турыстычных маршрутаў
Сёлета Лукаш Леанюк удзельнічае ў новым конкурсе з новымі васьмю мядзведзікамі. Калі беларус выйграе, то атрымае бюджэт у размеры 130 000 злотых на рэалізацыю свайго праекта. Гэта трэці ўдзел беларуса ў гарадскім конкурсе.
Леанюк падкрэслівае важнасць падтрымкі праекта, бо яго ініцыятыва, накіраваная на пашырэнне папулярнага турыстычнага маршруту ў Беластоку. Калі беларус атрымае фінансаванне, вырашальнае слова з новымі фігуркамі застанецца за жыхарамі Беластока. Гараджане вызначаць, якія менавіта восем міні-скульптур з’явяцца ў гарадскім асяроддзі.
Каб новыя фігуркі маглі быць устаноўлены ў Беластоку, неабходна прагаласаваць за праект «Białystok WidziMisie» ў грамадзянскім бюджэце на 2025 год. Праект мае нумар M. 19.
16 мішак і турыстычная мапа
Першыя восем мядзведзікаў з’явіліся ў Беластоку ў 2021 годзе дзякуючы Лукашу Леанюку — прадстаўніку беларускай меншасці Падляшша. Увасобіць задумку ў жыццё Лукаш змог дзякуючы падтрымцы з беластоцкага бюджэту грамадзянскага ўдзелу. Гэта спецыяльная частка бюджэту горада, якую можна накіроўваць на розныя праекты, якія палічаць важнымі жыхары. Любы ахвотны можа падаць заяўку, а камісія абірае пераможцаў. Горад вылучае на гэта фінансаванне.
У 2018 годзе за праект беларуса прагаласавалі 630 беластачан. А праз пяць гадоў працяг праекта Лукаша падтрымала амаль 7 тыс. чалавек. На новыя восем мішак беларус атрымаў 108 тыс. злотых. Фігуркі рабіў у Кракаве мастак Даміян Куцаба. Такім чынам, сёння ў Беластоку ўжо 16 мядзведзікаў.
У ліпені ў Беластоку з’явілася спецыяльная турыстычная мапа з мішкамі Białystok WidziMisie. Над ёй працавалі стваральнікі мапы «Беларускія сляды Беластока».
Мядзведзікі — сімвал Падляшша?
Лукаш тлумачыць, чаму загарэўся ідэяй, каб на вуліцах Беластока з’явіліся менавіта мішкі:
— У Польшчы ёсць легенда, такі кпін, — на Падляшшы, у Беластоку і іншых месцах Беласточчыны, так холадна, што тут ужо белыя мядзведзі ходзяць па вуліцах і ядуць людзей. Мне хацелася візуалізаваць гэты стэрэатып, каб беластачане пасмяяліся з сябе. Калі чалавек сам з сябе смяецца, то іншым ужо смяяцца не хочацца. У гэтым ёсць крыху тэрапеўтычнага сэнсу, каб падбадзёрыць жыхароў, што мы супер: «Белыя мядзведзі? Ну акэй, то маем белых мядзведзяў!»
У галасаванні ўдзельнічаюць усе жыхары Беластока.
