Акт вандалізму зафіксавалі ў Гродне на вайсковых могілках 7 снежня. Нявядомыя вырвалі памятныя пліты каля Катынскага крыжа. Там былі дошкі памяці ў гонар гродзенцаў, забітых сталінскімі карнікамі з НКВД у 1940 годзе. Пра інцыдэнт на сваёй старонцы расказаў прадстаўнік Саюза палякаў у Беларусі Марэк Занеўскі.
Ля Катынскага крыжа вырвалі тры мемарыяльныя таблічкі, на якіх была інфармацыя на польскай і беларускай мовах. Надпісы на плітах:
«ZIEMIA Z GROBÓW KATYŃSKICH. ЖЫXAPAM ГPOДHA, AФIЦЭPAM BOЙCKA ПOЛЬCKAГA, PACCTPAЛЯHЫM У CTAЛIHCKIX ЛAГEPAX».
— Катынскі крыж з’яўляецца сімвалічным і вельмі важным месцам для палякаў Гродна і Гродзенскай вобласці. На жаль, барацьба з польскасцю ў Беларусі працягваецца. Нацыянальная меншасць, месцы памяці, магілы жаўнераў, школы і адукацыя, усё, што сёння польскае, беларускія ўлады разглядаюць як варожы элемент, — напісаў Занеўскі.
Барацьба з польскасцю
Ліквідацыя польскіх магіл і мемарыяльных месцаў з’яўляецца чарговым прыкладам дзеянняў рэжыму Лукашэнкі, накіраваных супраць палякаў у Беларусі. Цягам 2022 года ў Беларусі руйнавалі могілкі і помнікі жаўнерам Арміі Краёвай. 1 ліпеня СМІ паведамілі пра разбурэнне пахаванняў у Ёдкавічах Бераставіцкага раёна, 4 ліпеня — у Мікулішках Ашмянскага раёна, 8 ліпеня — у Ваўкавыску, 9 ліпеня — у Качычах Карэліцкага раёна. 22 ліпеня стала вядома пра разбурэнне могілак жаўнераў АК у Стрыеўцы пад Гроднам. 25 жніўня каля вёскі Сурканты ў Гродзенскай вобласці невядомыя зраўнялі з зямлёй могілкі Арміі Краёвай — адны з буйнейшых у рэгіёне, дзе ёсць пахаванні польскіх жаўнераў. Вядома, што каля вёскі Пяскоўцы разбураны памятны знак палякам, якія загінулі ў баях з войскамі НКВД. У верасні знішчылі пахаванне ў вёсцы Плябанішкі Гродзенскага раёна.
Старшыня Гродзенскага аблвыканкама Уладзімір Каранік як кіраўнік рэгіёна сітуацыю не каментуе. Ён наогул запрашае польскіх турыстаў скарыстацца бязвізавым рэжымам і наведаць Гродзеншчыну.
Варварства ўсё бліжэй да Гродна: беларускія ўлады разбурылі яшчэ адны могілкі жаўнераў Арміі Краёвай
